Jowhar,(insidesomalia.org)- Ciidamo Madani ah ee dhawaan loo sameeyay Magaalada Jowhar ee Xarunta Gobolka Shabelaha Dhaxe ayaa lagu soo waramayaa in ay Maanta toogasho gudaha Magaalada ay ugu dileen qof rayid ah.

Ninkan ayaa geeriyooday ka dib markii rag la sheegay in ay ka tirsan yihiin Ciidamada Madaniga ee dhawaan loo sameeyay Magaalada ay toogteen, iyadoo aan la ogeyn ujeeda ay u dileen ninkaasi rayidka ah.

Ninkaan dilka loogaystay ayaa waxa uu ahaa nin ka xoogsada Warshadii hore ee Sokorta oo ku taala Xaafada Horseed ee Magaalada Jowhar sida ay xaqiijiyeen dadka deegaanka oo tilmaamay in ay fuliyeen rag ka tirsan Ciidamada Madaniga ee shalay laga sameeyay Magaalada Jowhar,kuwaasi oo loogu talogaley in ay sugaan amaanka Magaaladaasi.

Dhanaca kale Salaad Roobdoon ah ayaa maanta waxaa lagu dukaday Magaalada Jowhar ee Xarunta Gobolka Shabelha Dhaxe, iyadoo ay ka soo qeyb galeen Salaadaasi roobdoonka ah Culamaa’udiin iyo dad weyne aad u fara badan, kuwaasi oo alle kabaryey roob in uu siiyo sidoo kalana kuleelka kuleylka iyo Roob la,aantana uu ka qaado.